六合彩可以抗通脹？

通脹高企，買樓難是每個香港市民的心聲，大家無不關注如何抗通脹及如何盡快上樓。馬會看準市民的需要，今年5月於各大傳媒大賣廣告，以有逾億元獎金作宣傳，吸引市民購買六合彩發橫財夢，令全城陷入瘋狂，甚至有家長帶同子女到投注站，完全漠視賭博對青少年的負面影響。六合彩看似一門簡單，沒有「技術」，純粹靠運氣的遊戲，可有人為此白度了10年青春，輸得一身是債。在他們眼中，六合彩不但有技術，更有橫財夢，而這個夢，一星期發三次，每次可以花上幾千元。至此，誰人能說：香港賭風不盛，六合彩害不了人？
 
阿強（假名），30多歲，中五畢業出來擔任文職工作，月薪過萬，每個月可以給幾千元家用供養父母，應該衣食無憂。可是阿強2009年卻破了產，不能申請信用卡，銀行只得一個戶口，與家人同住，甚至去到一個地步：「女朋友，依家我唔諗啦……」
 
阿強，最愛賭以小博大的遊戲，先是六合彩，之後是賽馬的3T。這一切，起源自80年代的電影《富貴逼人》：「當時我又係住公屋，覺得錢重要，可以買到樓。好多嘢屋企人買唔到，要同爸爸媽媽講好耐先買到遊戲機，睇完套戲，發現原來可以咁樣發達。」

16歲初嚐投注滋味

雖然阿強一家人都不賭錢，但他16、17歲已嘗試入投注站買六合彩：「一個人走入去，無人知道自己買咗，返到屋企講畀爸爸媽媽聽，佢哋都覺得好平常，無咩反應。18歲就真係光明正大入去買，都買咗幾次。」後來做暑期工時，有朋友教他買馬，當時就知道原來馬會「可以買好多嘢」，而且可以十元八塊「博」百幾萬元，甚至幾千萬元。
 
話雖如此，但六合彩號碼多，不是很難買中嗎？但阿強卻說不：「初時都係買電腦飛，有時都會中安慰獎，但係有次見到好多人係投注站入面，望住個表，睇近10期、20期號碼，睇睇下覺得……又好似有啲路捉，可以將範圍收窄至20個，咁易中啲。」
 
如是者，試了一次，居然真的中了個細獎，收150元。

以小博大的遊戲好像「行得通」，於是由複式，去到玩「膽拖腳」：「有陣時玩到1,000元一次，星期二、四、六都買，覺得無買到好似錯失咗一個發達的機會咁，之後每次都覺得真係差少少就中，下次就會中，又會想日日都有六合彩開，因為咁樣日日都有機會中。」
 
因為賭博要花一大筆錢，阿強甘願節衣縮食，每天只食麵包，上班選在居所附近的地方，節省車資，平時沒有其他消遣。如是者過了10年，不拍拖，不煙不酒，還每個月給3,000元家用。他說：「有時無錢畀，會去銀行透支信用卡。」

賭上癮滾債逾20萬

試過最多透支「碌爆」三張信用卡，加上分期還款的消費，阿強長時間只支付最低還款額，以為慢慢可以還完所有債務，直到有天收到銀行的信。他說：「原來銀行有定息還款，佢見我還最低還款還得好定，於是叫我改借錢。」借了五、六萬元，但阿強沒有乖乖地將錢用來還債，還了一大半之後，又旅行又賭錢。
 
隨著卡數，銀行數漸多，初初要中大獎的心態開始動搖：「後來希望中個二獎、三獎都好，啲錢好快會返來，於是一直賭，又成日都中三、四個字，雖然拎到錢，但係總覺得自己好近中獎，又借又賭咁。」直至有天，心血來潮，數數自己的債務，原來有20多萬元，遂去求助。
 
現在，阿強返教會，平時學日文、話劇，學習重新規劃不用賭錢之後所有多出來的時間。回想以前發夢會發達的生活，阿強說：「以前好似係個迷宮度氹氹轉，搵唔到出口，依家見條路，雖然好黑，但係神好似一盞燈，照住少少前路，但係都仲係有好多未知。」

教會多隱形賭徒

 教會對賭博的教導可能多，但貼身的牧養未必足夠。以阿強為例，十多歲開始返教會，在青少年期已受洗的他，有事奉、團契、參加崇拜，但由學賭、迷賭到成為病態賭徒，敎會完全不知情，直至很後期才東窗事發。他說：「之前都有導師同我傾過我賭錢的情況，但係其實我都係俾另外一位弟兄帶去賭錢的。」

到了今日，阿強也未有向教會肢體分享他的經歷。他說：「教會的朋友唔知（發生咩事），返到工福反而會講，因為大家都係過來人，較易分享到自己的諗法和情緒。」

相對教會，阿強與家人的關係大致復和。他說：「初時家人知道之後好失望，甚至有問過親友借錢，希望可以還到條數，但係我最後都睇番還款能力，決定申請破產。家人最後都好支持。」